Talningakerfi blog.is

Framkvæmd talningar

Talningin fer fram með javascript-skrá sem vísað er í á hverri bloggsíðu. "Róbótar", t.d. frá leitarvélum eins og Google, eiga að öllu jöfnu ekki að hafa áhrif á talninguna, heldur einungis heimsóknir frá fólki sem er að nota vafra sem styðja Javascript.

Ef notandi á fleiri en eitt blogg teljast þau hvert fyrir sig. Myndaalbúm og myndasíður teljast með til meginbloggs. Heimsóknir í stjórnborðið eru ekki taldar.

Vefkökur eru notaðar í talningunni til að greina notendur að.

Helstu hugtök

Við skráningu heimsóknarupplýsinganna er reynt að greina milli mismunandi gerða af heimsóknum:

• Fletting telst það þegar einhver síða undir viðkomandi bloggi er sótt og skoðuð af einhverjum tilteknum notanda. (Í þessu samhengi eru myndir eða annað aukaefni inni í síðu ekki taldar með til síðna).
• Innlit er fyrsta fletting tiltekins notenda á klukkustundar tímabili. Ef notandi t.d. skoðar eitthvert blogg tvisvar með hálftíma millibili telst það eitt innlit, en ef tvær klukkustundir líða á milli eru tvö innlit talin.
• Gestur er notandi sem skoðar eitthvert blogg a.m.k. einu sinni á tilteknum degi. Ef hann kemur aftur sama dag er því ekki talinn nýr gestur. Gestatalningin byrjar upp á nýtt á miðnætti dag hvern.
• IP-tölur: Sérhver tölva á netinu hefur IP-tölu sem greinir hana frá öðrum tölvum. Vefþjónar mbl.is og blog.is sjá þó ekki alltaf raunverulega IP-tölu vélarinnar, heldur getur hún haft samband við þá gegnum aðra tölvu (svokallað vefsel eða "proxy-server") sem minnkar bandvíddarnotkun og álag á netið með því að miðla tengingum margra notenda. Talningin á fjölda IP-talna getur gefið ákveðna vísbendingu um dreifingu notendahópsins sem skoðar tiltekna bloggsíðu og einnig um áreiðanleika gestatalningarinnar.

Birting niðurstaðna

Birting á upplýsingum um heimsóknatalningu á sér stað á þremur stöðum:

• Heimsóknaboxið er síðueining sem skilgreind er í flestum útlitsþemum á blog.is. Hægt er að bæta henni inn í önnur þemu, t.d. Skólaþemað, með því að fara í Stillingar → Útlit → Síðueiningar. (Á sama stað má eðlilega fjarlægja hana úr þemum þar sem hún er fyrirframskilgreind).
• Stjórnborðið: Heimsóknarupplýsingar sjást undir flipanum Heimsóknir á forsíðu stjórnborðsins.
• Topplistinn: Af forsíðu blog.is er tengt inn á síðu með upplýsingum um vinsælustu bloggin síðastliðna viku, þar sem hluti heimsóknarupplýsinganna birtast. (Athugið að ef stillt er "Nei" við "Sjáist í listum?" undir Stillingar → Blogg í stjórnborðinu mun bloggið ekki sjást hér jafnvel þótt það sé vinsælt).

Um "svindl"

Heimsóknatalningin er einungis til gamans gerð og ekki ber að taka hana of alvarlega. Engu að síður getur gamanið kárnað ef tilteknir notendur eða stuðningsmenn þeirra reyna að hafa áhrif á talninguna á óeðlilegan hátt.

Mbl.is áskilur sér því rétt til að bregðast við slíku "svindli" með því að leiðrétta heimsóknartölur viðkomandi bloggsíðu eftir bestu vitund eða jafnvel alveg að hætta að birta þær.

Um gamla heimsóknakerfið

Þar til 7. maí 2007 var notað eldra kerfi sem taldi "heimsóknir", sem hvað fjölda varðar voru einhvers staðar milli flettinga og innlita.

Í upphafi var í því kerfi reynt að draga úr aukaheimsóknum sem bloggarar fengu þegar vefnotendur smelltu á tilvísanir í blogg þeirra á forsíðu mbl.is, forsíðu blog.is eða úr fréttatengingum á mbl.is. Hugmyndin með þeirri aðgerð var að jafna aðstæður bloggara til að afla sér sýnilegra vinsælda. Sömuleiðis var sett takmörkun á fjölda talinna heimsókna á hvert blogg frá tiltekinni IP-tölu á hverri klukkustund. Í byrjun árs 2007 voru flestar þessar takmarkanir felldar úr gildi, auk þess sem ýmsar aðrar breytingar voru gerðar á framkvæmd talningarinnar. Það liggur í hlutarins eðli, að þetta skapaði ósamræmi í tölum fyrir og eftir breytinguna.

"Heimsókn" í gamla kerfinu var því illa skilgreint og ógegnsætt hugtak sem erfitt var að bera saman við aðrar mælieiningar. Núverandi kerfi bætir vonandi úr því.