Reglur varðandi skrif á blog.is

Blog.is er vefur rekinn af Morgunblaðinu þar sem einstaklingar geta opnað sínar eigin bloggsíður.

Notandi velur sér notandanafn og lykilorð við nýskráningu. Notandi ber ábyrgð á því að lykilorði sé ekki deilt með öðrum og ber því fulla ábyrgð á því sem framkvæmt er eftir innskráningu. Gefi notandi bloggsíðu öðrum heimild til að skrifa á síðuna ber hann fulla ábyrgð á skrifunum.

Með því að ljúka innskráningu staðfestir notandi að hann hafi skilið þessar reglur og sé þeim samþykkur. Morgunblaðið áskilur sér rétt til að breyta reglunum án fyrirvara.

Notendum er frjálst að koma fram undir dulnefni á bloggi sínu, en ekki er heimilt að villa á sér heimildir. Morgunblaðið áskilur sér rétt til að loka án frekari fyrirvara fyrir aðgang notanda sem verður uppvís að slíku.

Notandi sem ekki gefur upp fullt nafn sitt samkvæmt Þjóðskrá á bloggsíðu sinni getur ekki bloggað um fréttir á mbl.is og verður ekki sýnilegur á forsíðu blog.is eða á blogglistum.

Notkun á texta, skjölum, hugbúnaði, myndböndum, tónlist og öðru höfundaréttarvörðu efni á síðunni er óheimil nema með samþykki rétthafa. Slíkt efni verður fjarlægt að beiðni rétthafa. Ef notandi bloggsíðu gerist ítrekað sekur um að setja höfundaréttarvarið efni inn á síðu áskilur Morgunblaðið sér rétt til þess að loka viðkomandi síðu.

Með því að staðfesta þessa skilmála er notandi að staðfesta að hann beri ábyrgð á öllum skrifum, myndbirtingum, myndbandabirtingum og öðru efni sem birtist á síðu hans. Óheimilt er að birta á síðum efni sem særir blygðunarsemi manna. Morgunblaðið ber á engan hátt ábyrgð á því sem notandi eða þeir sem heimsækja síðu notanda setja á síðu notanda.

Óheimilt er að senda ruslpóst (spam) og auglýsingar í gegnum kerfið eða að nota það á annan hátt í atvinnuskyni. Lokað verður fyrir aðgang notanda sem verður uppvís að slíku eða misnotar gestabækur eða aðra hluta kerfisins.

Notandi samþykkir að miðla ekki ólöglegu efni, áreiti, hótunum, særandi skrifum eða nokkru öðru sem getur valdið skaða. Notandi samþykkir sérstaklega að miðla ekki háði, rógi, smánun, ógnun eða ráðast á mann eða hóp manna vegna þjóðernis, litarháttar, kynþáttar, trúarbragða eða kynhneigðar, í samræmi við ákvæði 233. gr. a. almennra hegningarlaga nr. 19/1940.

Morgunblaðið áskilur sér rétt til að loka fyrir fréttatengingar notenda sem tengja særandi eða óviðurkvæmilegar bloggfærslur við fréttir eða færslur sem koma fréttinni ekkert við.

Morgunblaðið áskilur sér rétt til að grípa inn í, bregðist notandi ekki við óskum eða tilmælum um leiðréttingar/lagfæringar á skrifum sem teljast meiðandi eða brjóta gegn skilmálum þessum. Jafnframt áskilur Morgunblaðið sér rétt til að loka síðu notanda, að hluta til eða í heild, án þess að notandi eða þriðji aðili öðlist skaðabótarétt.

Morgunblaðið ber ekki ábyrgð á tjóni vegna bilunar í tölvubúnaði eða ef þjónustan er óvirk. Morgunblaðið ber heldur ekki ábyrgð á þeim gögnum sem kunna að glatast af þessum sökum eða öðrum.

Rísi dómsmál vegna notkunar vefsins skal það rekið fyrir Héraðsdómi Reykjavíkur.